Barrita: Tag P20 nga kilo sa bugas humay, ania na

Sugod karong semanaha, ang mga lokal nga kagamhanan sa lalawigan sa Sugbo mamaligya ngadto sa labing nanginahanglan nga mga lomulupyo sa tag P20 ang kilo nga bugas humay gikan sa National Food Authority (NFA). Niabot kini human sa Semana Santa. Busa, makaingon kita, "Consummatum est, sama sa gipamulong ni Hesukristo samtang nagbitay didto sa krus.

" Sa Iningles, “It has been accomplished." Natuman na gyud ang saad nga tag P20 ang kilo sa bugas. Dili kadtong pasiaw nga P20 na lay kuwang para mahimong usa ka gatos.



Si Cebu Gov. Gwen Garcia namalibad nga di kini vote-buying, labi na karon nga nagsingabot ang eleksyon. Kay matod pa niya, ang mga tawo man maoy mamalit.

Kon mao na, pagatawgon kining maong programa nga rice-buying, di vote-buying. *Sa ato na nga giingon dinhi, mahitabo lang ang tag P20 nga kilo sa bugas humay kon gahinan kini og subsidy gikan sa kagamhanan. Mao kini karon ang nahitabo sa ipamaligya nga tag P20 nga matag kilo sa bugas humay sa lalawigan sa Sugbo.

Ang bugas paliton gikan sa NFA sa tag P33 ang kilo. Kon ibaligya og tag P20 ang kilo, dunay alkanse nga P13 ang kilo. Abagahon kini sa Department of Agriculture (DA) ug sa lokal nga kagamahan nga magtunga sa alkanse nga tawgon og subsidy, P6.

50 sa DA, P6.50 sa lokal nga kagamhanan. Dunay nangutana kon nganong di na lang gyud ipanghatag ang bugas ngadto sa mga kabus, nganong ibaligya pa man gyud og tag P20 ang kilo.

Angay natong masabtan nga mao man kana ang saad, busa mao kana ang tumanon, di ba? Pero kon ipanghatag, mas malipay ang mga tawo, kay labaw pas natuman ang saad. *Kon maghisgot ta ining pagpamaligya nga maalkanse, makahinumdom ko sa usa ka personalidad sa nobela nga Catch-22 ni Joseph Heller nga morag naalkanse pero nakaganansiya diay gihapon. Ibutang lang nato ang presyo sa pesos.

Si Milo Minderbinder mopalit og itlog sa tag P1 ang buok sa Sicily ug iyang ibaligya og P4.50 sa Malta. Iyang paliton og balik sa tag P7 ang buok unya ibaligya og tag P5 sa ilang air force base.

Sa ato pa, miganansiya siya og P3.50 sa Malta, naalkanse og P2 sa air force base, apan niganansiya gihapon og P1.50.

Kining paagiha di makalusot sa mga lagda sa Commission on Audit. Alang ra ni sa mga magpapatigayon nga maoy nagkontrolar sa mga kamerkadohan..