1 week Ago By Editoryal
Layo pa man tuod sa tinuod nga mahuman kining underground cable project nga i-implementar sa tibuok Dakbayan sa Sugbo apan ang mahinungdanon, nasugdan na kini. Ning maong lakang, nakapanukad na ang dakbayan paingon sa mas limpyo, mas luwas, ug mas modernong talan-awon nga palibot, nga maghatag og imahe kon unsa ka mauswagon ang usa ka lugar. Si Councilor Jerry Guardo, kinsa maoy tsirman sa infrastructure committee sa konseho, nibutyag ning bag-uhay lang nga nakompleto na ang pagtaod sa 500-meter underground cable sa South Road Properties (SRP).
Ang underground cable project sa SRP ug sa heritage district gilusad ni Mayor Raymond Alvin Garcia niadtong Marso, nga nahisubay sa City Ordinance 2750. Kining maong ordinansa, nga giaprubahan niadtong Agusto, 2024, adunay mandatu sa pagtaod og underground cables alang sa utility, power, television ug telecommunications sa hurisdiksyon sa dakbayan. Tinuod nga wala pa sa kumigking kining 500 ka mga metro nga underground cables nga nataod na sa SRP kon kahumanan sa tibuok proyekto ang hisgutan.
Apan karon nga nasugdan na kini, dako ang posibilidad nga mapaspas ang pagtaod og underground cables lukop SRP nga adunay kinatibuk-ang gilay-on nga 22 ka mga kilometro. Matod ni Guardo nga kon magmalampuson ang pilot project, hayan isunod na ang pagtaod og underground cables sa mayorihiyang kadalanan sa dakbayan. Ning tuiga, ang dakbayan nagplano nga sugdan ang pagtaod og underground cables sa Natalio Bacalso St.
, Osmeña Blvd. paingon sa Talamban, ug P. del Rosario St.
hangtod na sa M.J. Cuenco Ave.
sa Mabolo. Giangkon ni Guardo nga usa ka dakong hagit ang pagtaod og underground cables sa tibuok dakbayan apan tataw nga positibo ang iyang panglantaw nga malimpyo gikan sa samok tan-awon nga “spaghetti wires” ang Queen City of the South sa ugma damlag. Gani, matod ni Guardo nga posibleng makalangan sa tibuok proyekto ang pagtaod og underground cables sa heritage district gumikan sa kadaghang requirements una kini maimplementar.
Nasayod si Guardo nga mahuman na lang ang iyang termino isip konsehal apan dili pa mahuman kining maong proyekto. Hinuon aduna na siya’y lakang nga gihimo aron dili mausik o mapasagdan kining maong proyekto. Si Guardo, kinsa naa na sa iyang katapusang termino, niingon nga iyang ipasa kining maong proyekto ngadto ni Councilor Edgardo Labella II, kinsa maoy tsirman sa committee on information, communication and technology sa koneho.
Malangan man o dili, ang mahinungdanon nga aduna na’y nakitang kahayag nga puhon, mahuman ra kining maong proyekto. Apan ang kalampusan sa proyekto nagdepende sa koordinasyon sa tanang mga sektor hilabi na sa lokal nga kagamhanan, cultural agencies, ug pribadong mga kontraktor..
