Gi-knockout ni Hu sa 3rd round si Apolinario

Nasugamak sa 3rd round knockout nga pilde si one-time world title challenger Filipino Dave Apolinario batok ni Chinese Longyi Hu sa ilang away sa Japan niadtong Martes, Abril 22, 2025, sa Korakuen Hall sa Tokyo. Si Apolinario niagresibo dayon sa pagsugod pa lang sa away unya nakapasulod siya og makusog nga left uppercut nga nakatay-og kang Hu. Gisuwayan ni Apolinario paghuman og sayo ang away apan nakasugakod si Hu paghuman sa 1st round.

Sa 2nd round, si Hu na sab ang niataki og maayo unya pag-abot sa 3rd round, iyang napatumba si Apolinario pinaagi sa iyang wala nga kumo. Nakabarog pa si Apolinario apan gitumba siya pagbalik ni Hu sa ika-1:45 minutos sa round pinaagi sa tuong kumo, ning higayuna, wala na nakabarog ang Pinoy human sa ihap sa referee. Si Hu nisaka sa 9-2-2, 5KOs nga rekord samtang si Apolinario nahagbong sa 21-2, 14KOs nga baraha.



/ EKA, ESL.