1 week Ago By Rojean Grace G. Patumbon
MATUD sa Department of Education-Davao Region (DepEd-Davao) nga ang paghimong "pilot" sa pagpalig-on sa kurikulom alang sa Senior High School (SHS) pagsulay pa lang ug di garantiya nga atomatik nga ma-implementar sa sunod nga mga tuig sa tingtungha. Butyag ni Jenielito “Dodong” Atillo, tigpamaba sa DepEd-Davao, nga ang linugdangan sa pagpaylot magsilbi nga basihan alang sa hukom sa departamento kung ipabilin ang kasamtangan nga SHS tracks o ibalik ngadto sa kanhi paagi. “Piloting palang po ito and this is not the mirror or already of what would transpire in the years coming, whatever will be the effect of this whether this will be good or bad, or not then that is going to be the basis of the department,” matud niya.
Iyang gi-esplikar nga ang pilot schools mogamit sa gipalig-on nga kurikulom, samtang ang mga non-pilot schools magpadayon sa pagtuman sa kanhi paagi. Sumala ni Atillo nga ilawom sa gipalig-on nga kurikulom, ang upat ka existing tracks: Academic, Technical-Vocational, Sports, and Arts pakubsan ngadto sa duha: Academic and Technical-Professional. Dugang pa niya nga ang mga paagi wala malakip sa giusab nga duha nga gi-categorized isip "electives" aron nga hapsayon ang programa sa SHS.
“But this would only run for few schools here in Davao Region, katong pilot schools nato,” pasabot niya atol sa Davao Peace and Security Press Corps, Miyerkules sa buntag, Abril 23, 2025, sa Royal Mandaya Hotel. Sa dihang gipangutana kung unsa nga mga tulunghaan ang nag-implementar sa gipalig-on nga kurikulom, sulti ni Atillo nga di usa sila mohimo og opisyal nga pagpahibawo. Apan giklaro niya nga mga pampubliko ug pribadong eskuwelahan ang malambigit niini.
Dugang esplikar ni Atillo nga ang ihap sa mga tulunghaan nga mag-implementar sa maong kurikulom mag-agad sa gidak-on sa school division offices. Kung ang school division gamay lang ilabi na sa ilang coverage area ug ihap sa mga eskuwelahan, usa ka pampubliko ug usa sab ka pribadong tulunghaan mag-implementar niini. Alang sa medium-sized nga dibisyon, usa ka pribado ug duha ka pampublikong eskuwelahan; ug ang dako nga dibisyon, dunay duha ka pribado ug tulo ka pampublikong tulunghaan.
Matud niya nga ang Davao City nahisakop sa dako nga dibisyon busa dunay duha ka pribado ug tulo ka pampublikong tulunghaan ang malakip niini. Aduna na say gidesinyo ang departamento kung unsaon kini pag-implementar sa mga tulunghaan ug ila kining imonitor. Iyang gipahimug-atan nga ang input gikan sa pilot schools bililhon kaayo nga tinubdan sa impormasyon sa ka-epektibo sa gipalig-on nga SHS curriculum.
Kahinumdoman, nilusad ang DepEd og online public consultation sa SHS curriculum guides gikan Abril 4 hangtud Abril 11, 2025. Ang feedback gikan sa konsultasyon susihon og balik ug ihiusa ngadto sa final SHS curriculum framework. Gisulti ni Education Secretary Sonny Angara nga dunay phased implementation sa giusab nga SHS curriculum alang sa academic year 2025–2026.
(Rojean Grace G. Patumbon).
