Lacson nagpaabot sa mechanics sa bugas nga tag P20/kilo

Nagpaabot una sa mecha­nics si Negros Occidental Governor Eugenio Jose Lacson alang sa pagbaligya sa bugas sa tag P20 matag kilo sa Visayas. Si Lacson niingon nga si Agriculture Secretary Francisco Tiu Laurel Jr. mopahigayon og tigom sa tanang regional directors sa Kabisay-an karong Lunes, Abril 28, aron hisgotan ang mechanics kon unsaon sa pagpamaligya ang bugas nga tag P20 matag kilo ngadto sa mga benepisaryo.

Matod niya napakyas siya sa pagtambong sa tigom ni Presidente Ferdinand Marcos Jr. sa dakbayan sa Sugbo sa miaging semana tungod sa iyang mga pasalig sa kampanya kaniadto sa probinsiya. Dugang pa niya nga usa ka semana ang nakalabay, gipahibawo usab siya ni Cebu Governor Gwendolyn Garcia, kinsa nisugyot sa ideya sa pagbaligya sa bugas sa tag P20 matag kilo, ug gipasabot niya kung unsa ang dagan niini.



Una nang gianunsyo sa Department of Agriculture (DA) ang pilot launch sa P20 matag kilo nga bugas sa Visayas isip usa sa mga saad sa kampanya ni Marcos atol sa 2022 presidential race. “We are the pilot because Visayas is organized. The idea was to implement it immediately, but I don’t think it can be done immediately, because we have to identify the source of fund to purchase the rice,” matod ni Lacson.

Siya niingon nga kining bugas dili tinuod nga tag P20 matag kilo; P33 kini kada kilo diin ang sobra sa P20 i-subsidize sa local government unit ug National Government. Dugang niya nga ang suplay sa bugas kuhaon gikan sa National Food Authority (NFA). "Kung kini ipadayon, atong siguroon nga kini usa ka makaon nga bugas ug dili alang sa usa ka hayop," ingon ni Lacson.

Matud ni Lacson nga sa sinugdanan, limitahan kini sa 10 ka kilo sa matag panimalay matag semana o sa kinatibuk-an nga 40 ka kilo matag buwan, ug dili nila kini mabaligya sa rice retailers. Matod niya nga kini nga programa mag-una sa mga benepisyaryo sa Pantawid Pamilyang Pilipino Program (4Ps) ug ang LGUs usab ang mag-ila sa ilang mga lugar nga baligyaan. “We will have to find out and determine the total number of bags of rice will be supplied per month to the province, and we will have to identify where the funds will come from,” matod niya.

Gitataw sa gobernador nga ang Negros Occidental ubos pa sa state of calamity tungod sa Kanlaon, apan kutob sa mahimo, buhaton sa Negros Occidental ang tanan aron mahimong kabahin niini nga programa. Una nang gipahayag ni Laurel nga sa sinugdanan, target sa DA nga ipatuman ang P20 matag kilo nga bugas hangtod sa Pebrero 2026 apan gusto ni Marcos nga molungtad kini hangtod matapos ang iyang termino sa Hunyo 2028. / MAP.